Б.Батзаяа: Эрин үеийнхээ нам гүмийг эвдэх гэж би дуугарнам
2022-10-05 Podcast нэвтрүүлэг 727

Зугтаж зайлах аргагүй болохоор цусаар яринам.
Уг нь сэвшээ салхи, цэцэгс хийгээд цас, сар,
урьдын эзэнт гүрэн, дарсан доторх
шүлгийн хэлээр ч бас яримаар байна. Гэвч бодит байдал намайг
урсах цусаар л ярь гэв ээ. Тэр цус нь бүтэн жилжин
нар үздэггүй; эр, эм ялгаагүй ажилчин бүрийг,
хол одсон нөхөр, зайгуул эхнэрүүдийг
ав адилхан дарлаж хавчих шүдэнзний хайрцаг шиг
хавчиг нарийхан түрээсийн өрөөнүүдээс урснам.
Сичуаны эрс гудманд халуун ногоотой шөл зарж,
Хэнаний хөгшчүүл хөнжил гудсан дээр
аахар шаахар юмс худалдаж, би гэдэг хүн харин
хажууд нь амь зуух гэж өдөржин зүдэрч,
хааяадаа шүлэг бичих гэж л шөнө дунд нүдээ нээнэм.
Энэ хүмүүсийн тухай танд ярих нь,
эгэл өөрсдийнхөө тухай ийн хүүрнэх нь
амьдралын балчиг намаг дунд бид бүгдээрээ
арайхийн урагшилж цөхөх шоргоолж төдий гэдгийг л
хэлэх гэснийх ээ...

Энэ бол Хятадын цагаач ажилчин яруу найрагчдын "Төмөр сар" түүвэр дэх шүлэг юм. "boobooks" creative team-ийн залуус тэрчлэн Америкийн зохиолч, найрагч Чарльз Буковскийн "Хүүхнүүд" роман, Хятадын зохиолч Ма Жианы "Хэлээ гарга" өгүүллэгийн түүвэр, Оросын авангард зохиолч Данийл Хармсын "Оршихуй №2" гэхчлэн үргэлжлэх "андерграунд цуврал", мөн Чарльз Буковскийн (Ийм номд нэр өгөөд яах вэ), "Төмөр сар" түүврүүд бүхий "boopoem цуврал", "Эрчүүдийн үнэн түүх" дэлхийн шилдэг өгүүллэгийн түүвэр эрхлэн гаргаад буй. Хэт нухацтай утга зохиолоос зориуд тойрч, бохир реализм, авангардизмаар илрэх нийгмийн цөөнх, зовж зүдэрсэн ажилчин ангийн дуу хоолой , буурай үндэстний үнэн амьдралын өнгө төрхийг гэрчилсэн бүтээлүүдийг ийнхүү сонгон хэвлэж буй шалтгааныг нь асууваас "эрин үеийнхээ нам гүмийг эвдэх гэж бид дуугарнам" хэмээн тэд хариулна. "Үлдэх үг" подкастын ээлжит зочноор "boobooks" creative team-ыг үүсгэн байгуулагчдын нэг, зохиолч, яруу найрагч Батхүүгийн Батзаяаг урьж, ярилцлаа. 

Түр хүлээнэ үү...
Top